La plataforma, qu’agrupa a los colleutivos DISEX Asturies, LBT Muyeres d’Asturies y Bujarra, cellebra mañana delantre’l Campuamor, a les siete y media la tardi, el Díi Internacional escontra la diversofobia
Mañana vienres 17 de mayu cellébrase internacionalmente el díi escontra les fobies a los colleutivos con orientaciones sesuales ya identidaes de xéneru estremaes a les heteronormatives, ello ye, homofobia y trasfobia, odios que, pesia los avances de les caberes décades, siguin vixentes tamién n’Asturies y acarreten consecuencies comu agresiones físiques y verbales y otres formes de violencia.
Un 17 de mayu foi la fecha na que se despatoloxizó oficialmente la homosesualidá, pero la griesca por conseguir el respetu a les opciones sesuales de cada persona sigui vixente, polo que llamen a manifestase y revindicar los drechos d’estos colleutivos marxinaos.
Dende la Plataforma Trasmaricabolu recuerden que tamién tan en llabores de coordinación pal Arguyu 2019 y que les asembleas esti añu van ser conceyos abiertos, ello ye, que cualquier persona a la que-y interese dar un gabitu y axudar a entamar esta cellebración ta convidáu/a a participar nel procesu.
Llucía F. Marqués
This work is licensed under a Creative Commons Attribution 4.0 International License.
