Énte la desapaición de la mina y l’industria Patricia García, candidata a l’alcaldía, reclama un plan d’actuación integral p’atraer visites como actividá económica principal del conceyu. Propón la creacion de delles rutes, museos y “Una oficina de turismu activa y con un horariu real a les necesidaes de los visitantes que vienen conocer Mieres”

Podemos Mieres recuerda l’afincamientu, a mediaos del sieglu XIX, de la “Asturian Mining Company” empresa minera de capital inglés, y cómu l’empresariu francés Numa Guilhou fundó pela mesma fecha la Fábrica de Mieres, dando entamu a una nueva dómina pa Mieres na que’l conceyu pasa d’una economía predominantemente agraria y ganaera a ser un de los principales cientros industriales del país. Esta riqueza ye güei principalmente memoria, resclavos industriales y mineros dignos de ser curiaos y protexíos.

“Cola creación d’un archivu de semeyes y una esposición permanente vamos consiguir que perdure na nuesa memoria coleutiva la importancia que tuvo Fábrica Mieres pal desendolcu ya identidá del nuesu conceyu”, desplica Patricia García Moru, candidata a l’Alcaldía por Podemos Mieres.

Pa la formación política, Mieres tien unos recursos históricos, culturales, paisaxísticos y mediu-ambientales considerables y descomanadamente esbardiaos. “Precisamos crear rutes temátiques y señalizales, promocionar los nuesos pueblos, monumentos, el nuesu maraviyosu paisaxe, la nuesa hestoria. Y sobremanera nun podemos dexar perdese lo qu’entá tenemos, tolo que se pierde ye irrecuperable”, enfatiza García Moru.

Podemos Mieres propón amás nel so programa elleutoral, crear un itinerariu imaxinariu que percuerra llugares nos que bienes patrimoniales como’l Teatru Capitol o’l Pombo, tengan de nuevu’l llugar que se merecen, señalando estos llugares con un panel desplicativu p’apreciar y recordar esos elementos que formaron parte de la identidá de Mieres.

Redaición InfoAsturies

This work is licensed under a Creative Commons Attribution 4.0 International License.