La Fiscalía de Mediu Ambiente abre dilixencies d’investigación pal esclarecimiento del orixe illegal d’un vertideru nes proximidaes de la localidá de Troncedo nel conceyu de Tinéu tres la denuncia formulada pola Coordinadora Ecoloxista d’Asturies

El vertideru alcuéntrase nes cercaníes de la localidá de Troncedo, allegante al trazáu de l’antigua carretera AS.350, nuna zona forestal d’altu índiz de riesgu de quemes.  Nelli hai estremada triba de residuos, pente ellos peligrosos como uralites.

La xestión de los arramaos ye una competencia municipal, polo que resulta evidente que’l Conceyu de Tinéu nun procedió al control, nin realizando la obligada retirada de les borrafes y derivación de los mesmos a un xestor autorizáu, nin decretáu la clausura cola correspondiente señalización tres la llimpieza de llugar, lo que podría dar llugar a responsabilidaes penales por omisión del deber.

Los numberosos vertideros clandestinos qu’hai n’Asturies, siendo munchos d’ellos un evidente riesgu de quema, suponen amás una fonte de contaminación del sosuelu y de les agües polos llixiviaos que se xeneren, polo que la CEA desixe l’adoción darréu de les oportunes midíes poles autoridaes competentes.

Soliciten la retirada de les borrafes per parte del Conceyu de Tinéu ya’l so treslladu a un xestor autorizáu, señalizándose la zona p’alvertir que los arramaos illegales van ser sancionaos, asina comu la implementación rial d’estes sanciones a los responsables, si ye que se-yos puede identificar tres de la investigación de los  fechos denunciaos.

This work is licensed under a Creative Commons Attribution 4.0 International License.