Los cambios del xesuita arxentín tan suponiendo una tresformación axitada de la Ilesia Católica

Ye’l Papa númberu 266 que se sienta na siella de San Pedro, pero ye’l primer non europeu en facelo. Dende l’aniciu la so actitú renovadora se foi visibilizando en xestos y llinguaxe de proximidá a les sos bases, al “Pueblu de Dios”, asina como la sociedá en xeneral. Al empar amosó distancia cola endogamia institucional propia de la xerarquía eclesiástica.

Dempués de cuatro año magar que les finances del Vaticanu siguen siendo tan opaques somo siempres, por mor de les sos midíes d’austeridá’l déficit foi amenorgáu a la metá.

La so actitú aperturista en materia de moral sexual nun dexó indiferentes a los sectores más conservadores, que lo cuestionaron abiertamente. “Si una persona ye gai, gueta al Señor y tien bona voluntá, ¿quién soi yo pa xulgala?” llegaría a afirmar públicamente’l Papa pa escándalu de munchos. El cardenal norteamericanu Raymond Burke, d’orientación derechiega, denunciaría que’l Vaticanu taba controláu por “una axenda gai”.

A fines de 2016 anunció que los sacerdotes podríen absolver del pecáu del albuertu de manera indefinida.

Tamién se ta desenvolviéndose un procesu d’alderique sobre’l papel de les muyeres na Ilesia, estudiándose la posibilidá de que puedan llegar al rangu de diacona.

Recientemente la Congregación pa la Doctrina de la Fe, institución encargada d’afitar la ortodoxa teolóxica, vetó la so decisión de crear un tribunal pa recoyer les denuncies de víctimes d’abusos sexuales por parte del cleru. Ye la primer vegada que se produz un vetu na Ilesia a una decisión pontificia.

Anque nun dulda en ser firme al respective de la xerarquía en distintes ocasiones como’l so discursu sobre les 15 enfermedaes qu’abasnaba la Curia romana o la destitución del Gran Maestre de la Orde de Malta, nun ta siendo un Papa autoritariu sinón que ta fomentando la participación de les bases.

This work is licensed under a Creative Commons Attribution 4.0 International License.