Ante la falta d’actuaciones de conservación y llimpieza de la costa asturiana por parte de les autoridaes responsables, son delles les iniciatives ciudadanes que convoquen sesiones de recoyida coleutiva de basoria peles sableres, nesta ocasión, na de Bañugues

Nel Díi Mundial de los Océanos, l’ocho de Xunu, el programa “Water Lovers” entama la llimpieza de delles sableres europees, una d’elles la de Bañugues, dientro de la so llucha contra’l plásticu nos oceanos. La campaña surde del respigante datu apurríu poles Naciones Xunies pal Mediu ambiente, que pronostica que pal 2050 habrá na mar más plástico que pexes.
N’Asturies son avezaes estes actuaciones, entá va pocu se recoyeron n’andecha les playes de Xagó y Cueves. Pero nun ye abondo, na costa asturiana hai ya rexistraes tres grandes concentraciones de plásticu, la más grande na vertical d’Otur, onde se rexistra una concentración tremenda de plásticu y otros 16 o 17 puntos nos que ye fácil alcontrar al bucear cantidaes descomanaes de basoria.

Llucía F. Marqués

This work is licensed under a Creative Commons Attribution 4.0 International License.