La Coordinadora Ecoloxista d’Asturies foi quien denunció les irregularidaes nel centru esperimental de San Pedro d’Anes en Sieru, que dieron como resultáu una sanción sobro la Fundación Barredo, titular de la mesma

La sanción, impuesta pola Confederación Hidrográfica del Cantábricu, ye debida a que la istalación escarez d’autorización alministrativa pa usar l’agua publica, procedente de la fonte’l Panizu, daqué que lleva faciendo illicitamente dende fai 14 años.

En tou esti tiempu denguna alministración comprebó la situación d’estes instalaciones, financiaes colos fondos mineros, y qu’escarecíen d’autorizaciones y medios anti contaminación. El centru dedícase al ensayu a escala real de la estinción del fueu nel interior de túneles, xenerando na so actividá una fuerte contaminación tanto atmosférica como acuifera, ensin cuntar con dalu mediu pa desaniciar la mesma.

Los fumos contaminantes producíos pola quema de combustibles nel túnel (gasóil, gasolines, maera, payes), afeuten direutamente a les llocalidaes de San Pedro d’Anes, Llanaces, Pañeda, Varé y Carrizal de los conceyos de Sieru y Noreña.

De resultes de les denuncies de la CEA, non solo foi sancionada sinón que ta prevista la istalación, a lo llargo del añu 2019, d’una depuradora pa les agües residuales. Anque’l Principáu” reconoz esta actividá como “cafiante (ruiu, vibraciones y emisiones de gas) y peligrosa (esposición a riesgu lléutricu, almacenamientu de llíquidos combustibles y quemes provocaes), trespasa tola responsabilidá ambiental al Conceyu de Sieru, entidá responsable de la so llicencia.

Redaición InfoAsturies

This work is licensed under a Creative Commons Attribution 4.0 International License.