Con esta decisión el Ministeriu d’Esteriores posiciónase en contra de los drechos de los escoceses y a favor de la represión, desautorizando al so propiu cónsul
Miguel Angel Vecino, fasta agora cónsul xeneral n’Edimburgu, Irlanda del Norte y Norte de Inglaterra, retrucaba a les declaraciones del europarlamentariu del PP, que menaciaba a Escocia col bloquéu español, con otres nes qu’especificaben qu’España nun vetaría l’ingresu d’una Escocia Independiente na X.E, en casu de que lu solicitare. La información foi bien acoyida polos escoceses y espublizada pol periodicu independentista “The National”.
El Ministeriu d’Esteriores, dirixíu en funciones por Josep Borrel, considera que “s’estrallimitó nes sos funciones” al falar en representación d’España al retrucar nuna carta, unviada a funcionarios del Executivu de Nicola Sturgeon y a la prensa, a les declaraciones feches por Esteban González Pons nel diariu The Herald, nes que declaró que “Escocia, de tornase independiente y solicitar l’ingresu na Xunión Europea alcontraríase con bloquéu español.” Al paecer l’europarlamentariu nun s’estrallimitó al falar en nome del estáu español, pero Vecino si, polo que pierde’l so puestu de cónsul xeneral n’Edimburgu.
Nun ye la primer vegada que Miguel Ángel Vecino denuncia represales contra elli, y de fechu l’añu pasáu presentare un recursu contenciosu alministrativu ante’l Tribunal Superior de Xusticia de Madrid por considerar arbitrariu ya illegal el caberu repartu de puestos nel estranxeru pa los miembros de la Carrera Diplomática, nel que se-y ñegaron tolos puestos solicitaos por quintu añu consecutivu. Nel repartu foron favorecios familiares y amigos d’altos cargos del Ministeriu d’Esteriores, ensin malpenes esperiencia profesional nin los conocimientos precisos pa los puestos, faltando inclusu en dalgún casu la formación en Drechu esplicitamente riquirida pa estos cargos.
Llucía F. Marqués
This work is licensed under a Creative Commons Attribution 4.0 International License.
