El segundu Campamentu n’asturianu tendrá llugar del 7 al 14 de Xunetu, na Casona Amarilla, l’antigua residencia d’Hunosa en Villamanín

La ONG Iniciativa pol Asturianu ta acabante anunciar la puesta en marcha d’un campamentu de branu pa rapazos y rapaces de 6 a 16 años. El campamentu, entamáu por Abruja ocio y del que Iniciativa ye collaboraor, va cuntar con un equipu de monitores de calidá, falantes d’asturianu que van facer que toles actividaes d’ociu que se desendolquen a lo llargo de los ocho díes tengan por llingua vehicular l’asturianu.

Dende Iniciativa valórase como una actividá de gran importancia pa collaborar na tresmisión xeneracional del idioma y confirmen que son munches les persones que  tán matriculando a los sos fíos nesta actividá, que como toles organizaes dende Iniciativa pol Asturianu sostiense ensin ayudes públiques.

El campamentu va cuntar coles actividaes tradicionales de los campamentos pensaos pa la mocedá, como gymkhanes, xuegos na piscina, miniquads, talleres… Pero amás, esti campamentu va tener delles actividaes especiales venceyaes a la llingua y cultura asturianes, tales como talleres de xuegos y deportes tradicionales y talleres sobre la hestoria d’Asturies.

Otru de los puntos fuertes d’esti campamentu n’asturianu ye la realización d’audiovisuales. Los neños van deprender los fundamentos básicos del trabayu audiovisual y van trabayar man a man con profesionales d’esti sector pa realizar proyectos de curtiumetraxes, videoclips y otres pieces d’esti tipu. Pa ello, van colaborar dende Cuatro Gotes Producciones, la plataforma de youtubers n’asturianu PlayPresta y la canal Alderiques d’Asturies.

El preciu del campamentu ye de 260,00 € con too incluyío, con descuentu a 230 pal segundu hermanu o segundu campamentu del branu.

Redaición InfoAsturies

This work is licensed under a Creative Commons Attribution 4.0 International License.