Los resultaos de la contaminación nel barriu de Xove recoyíes pola estación móvil del “Principado” multipliquen por siete los datos de la estación que lleva años puesta nel mesmu barriu

Acordies a los datos oficiales presentaos, con demora asgaya, na web del “Principado”, nos 90 díes que la estación movil tuvo guetando información sobro la calidá del aire nesti barriu del oeste xixonés, recoyó resultaos que disten abondo de la media recoyía nos caberos años pola estación fixa, pa la que vecinos y grupos ecoloxistes lleven tiempu reclamando un meyor allugamientu.  Pa ellos “Esto vien a demostrar lo que venimos denunciando dende va años, que les estaciones tan intencionadamente mal ubicaes pa midir menos contaminación de la que esiste”.

De fechu, nos mesmos tres meses que la estación móvil recoyó 29  díes nos que la contaminación superó la media diaria de 50 µg/m³ pa les Pm10,  la estación de Xove rexistró namás 4 díes de media perriba lo llegalmente permitío.

Tamién la media xeneral d’estos 90 díes ye contradictoria: entantu que la móvil tien una media de 46  µg/m³ , pasando’l másimu llegal de 40 µg/m³ de medía añal y duplicando ampliamente los 20 µg/m³ marcaos comu másimos pola OMS, la que lleva años en Xove foi de 27 µg/m³, ello ye, perriba lo aceutable pa la salú humana pero ensin superar les prohibiciones llegales españoles. En resume, pue dicise que la contaminación real media ye un 71% mayor que la que midía fasta agora. Ablucantes tamién son los valores algamaos na estación móvil, con picos d’un valor de 341 µg/m³  de partícules de Pm10, lo que da idega de lo que tan respirando munchos vecinos de Xixón.

Nun pue escaecese que dende va años el “Principado” vien informando que’n Xixón nun se superen los umbrales de contaminación de partícules na so rede d’estaciones, tal como informa al Ministeriu y esti espubliza nos sos informes, desestimando los datos de la estación del Ayuntamientu allugada nel Llauredal, que recueye una contaminación continua dende qu’entamó a apurrir datos, lo mesmo que pasa coles estaciones que dan datos de la materia sedimentable, que el “Principado” nun tien en cuenta pesi a los descomanaos valores qu’ufren, o precisamente por mor d’ellos.

Redaición InfoAsturies

This work is licensed under a Creative Commons Attribution 4.0 International License.