La presentación de la campaña contra l’esministru, conocíu poles sos polítiques represives, sedrá’l Miércoles 26 de xunu a les 19 hores nel Palaciu de Valdecarzana, n’Avilés, onde baxo’l so mandatu foi asesináu pola policía, pela espalda, un trabayador d’Ensidesa demientres facía una pintada
Rodolfo Martín Villa, conocíu pol nomatu popular de “La cachiporra de la transición” pola so particular dureza represiva, tuvo baxo les sos órdenes al Comisariu Conesa y a otros torturadores de la Brigada Político Social franquista, a los que non sólo mantuvo operativos sinon que condecoró, como ye’l casu de Billy el Niño.
Fore Secretariu del Sindicatu vertical y miembru del Conseyu del Reinu, qu’asesoraba a Franco n’estremaes materies y depués de la “transición” Gobernador Civil de Barcelona, Ministru de Relaciones Sindicales, de Gobernación, d’interior y Vicepresidente d’España, autor del llibru “Al servicio del Estado”, foi ún de los artífices principales de la política represiva contra’l movimientu obreru y social que reclamaba derechos y llibertaes nos primeros años de la Transición. Cuando él yera ministru cometiéronse crímenes tan graves como los de Vitoria-Gasteiz, selmana pro-amnistía, San Ferminos 78 y otros munchos socedíos a lo llargo y ancho del Estáu español. Naquel tiempu, n’Avilés, un trabayador d’Ensidesa recibió, pela espalda, un disparu de la policía cuando taba faciendo una pintada.
Anguañu, comu preba de la continuidá y vixencia del franquismu n’España, ye presidente del Sareb y nomáu nel 2013 miembru de númberu na Real Academia de Ciencies Morales y Polítiques, cofundaor de la Fundación de la Transición Española, vocal de FAES y miembru del Patronatu de la Universidá Pontifica de Salamanca, condecoráu recién por Felipe VI nel Congresu los Diputaos pol 40º cabudañu de les primeres elleiciones tres la dictadura.
La llei d’Amnistía de 1977 garantizó la impunidá a tolos responsables de la represión. La iniciativa “Xuiciu a Martín Villa” quier denunciar esta situación y demandar nos tribunales del Estáu español les sos responsabilidaes civiles, polítiques y penales pol so papel naquellos años. Martín Villa yá ta imputáu nos tribunales d’Arxentina por crímenes contra la Humanidá.
Representantes de dos asociaciones que promueven esta iniciativa dende Vitoria-Gasteiz y Iruña vienen a Asturies a cuntanos los avances d’esta campaña. Precisamente dalgunos d’ellos acaben de volver d’Arxentina, onde presentaron una solicitú pa que los fechos de 1978 s’incluyan na conocida como querella arxentina qu’instruye la xueza María Servini.
Llucía F. Marqués
This work is licensed under a Creative Commons Attribution 4.0 International License.
