Iniciativa pol Asturianu presenta quexes al Ministeriu de Fomentu y a Delegación de Gobiernu pola toponimia nes nueves señales de la ‘Y’ n’Avilés
La organización esixe la correición d’esti error acordies cola Llei d’Usu y los Decretos de toponimia
Iniciativa pol Asturianu presentó escritos al Ministeriu de Fomentu y a la Delegación del Gobiernu d’España n’Asturies dempués de comprobar que les nueves señales colocaes nos accesos de l’autopista ‘Y’ n’Avilés nun cumplen cola toponimia oficial. Los cartelos instalaos nun recueyen la nomenclatura oficial d’Uviéu y Xixón apaeciendo únicamente la denominación en castellán.
Dende la organización pídese la corrección d’esti error acordies colo afitao na Llei d’Usu y Promoción del asturianu de 3 de marzu de 1998, y col Decretu 105/2006, de 20 de setiembre, d’oficialización de la toponimia del conceyu de Xixón y colo que recueye’l Decretu 14/2019, de 13 de marzu, d’oficialización de la toponimia del conceyu d’Uviéu.
Iniciativa pol Asturianu afala a los conceyos y al futuru Gobiernu d’Asturies a facer un esfuerciu nel cumplimiento de los topónimos oficiales y a facer un usu normal d’ellos.
Redaición InfoAsturies
This work is licensed under a Creative Commons Attribution 4.0 International License.
