El coleutor dañáu, que ta contaminando una fastera natural protexía, nun ta siendo iguáu por problemes burocráticos

Depués de que les inundaciones de Xineru dañaren el coleutor de la depuradora d’Udrión, perteneciente a la estación depuradora de Trubia, les agües residuales de más de 3.000 vecinos de Trubia y alrodios viértense direutamente al ríu ensin dala triba de depuración nin tratamientu.

Nel intre de la riada el “Principado” tramitó planes “d’urxencia” pa la recuperación del furrulamientu d’esta infracadarma, pero cincu meses depués les obres d’igua nun tan siquiera entamaes. Fontes de la propia Alministración reconocen que nun hai dala torga téunica pal desendolcu de les obres, sinon que les complicaciones son esclusivamente de calter burocráticu y relacionaes coles competencies atribuyibles a les estremaes alministraciones implicaes.

Ye de destacar que’l llugar d’arramáu de les agües contaminaes pertenez a la Rede  Natura 2000 y que por mor de la presencia d’hábitats y d’especies de interés comunitariu, ta declarao como “Zona Especial de Conservación Ríu Nalón”, figurando pente les principales medies recoyies nel so correspondiente Istrumentu de Xestión “El saneamientu del ríu” y “Evitar arramaos contaminantes a los calces mediante la xixilancia ambiental”.

This work is licensed under a Creative Commons Attribution 4.0 International License.