Depués de cincu meses reclamando que s’iguaren les estroces nel coleutor de la depuradora d’Udrión, en Trubia, por fin entamaron coles obres
Les inundaciones qu’a finales de Xineru anubrieron la vega del Nalón ocasionaron emportantes estroces nel coleutor que recueye y depura les agües residuales de Trubia y otros pueblos de la contorna. Comu consecuencia les mesmes desembocaben direutamente nel calce del Nalón, coles evidentes consecuencies de contaminación del acuiferu y fedores avezaos. Seique la necesidá d’iguar les istalaciones foi declarada “urxente” darréu, nun foi fasta agora qu’entamaron les obres.
Entá la selmana pasada la Coordinadora Ecoloxista d’Asturies tornaba a denunciar l’avería, polo que se declaren gayasperos y aliviaos al saber que por fin se punxeren en marcha les obres que finarán col arramáu de les agües puerques de más de tres mil vecinos direutamente al Nalón, nun espaciu natural recoyíu na Rede Natura 2000 y que por mor de la presencia d’hábitats y d’especies d’interés comunitariu, ta declaráu como “Zona Especial de Conservación Ríu Nalón”, figurando pente les principales midies recoyíes nel so correspondiente Istrumentu de Xestión “El saneamientu’l ríu” y “Torgar vertios contaminantes a los calces mediante la xixilancia ambiental”.
Redaición InfoAsturies
This work is licensed under a Creative Commons Attribution 4.0 International License.
