El Cientru Social La Xusticia entama una quedada el vienres 19 de Xunetu pa facilitar l’apostasía a quien quiera solicitar la salida de la Ilesia Católica
La Ilesia Católica ya otres confesiones cristianes aprofítense d’una tradición secular, como ye la cellebración de les nacencies, para amontar de forma ilexítima la so implantación social, algamar más “miembros” de la so comunidá y con ello, más fondos estatales. Escaezse munches vegaes que’l bautizu nun ye una simple cellebración familiar, ye un “sacramentu” que presupón l’ingresu del naciellu n’una comunidá relixosa.
Munchos ciudadanos, al algamar la mayoría d’edá, atópense formando parte d’una confesión relixosa qu’enxamás escoyeron y que nun se correspuende coles sos idegues. Esti fenómenu refuerciase más entá depués de los polémicos posicionamientos de la ilesia pa con temes tan sensibles comu la pederastia, les violaciones o los drechos de los coleutivos LGTB+, ya qu’un puede alcontrase formando parte d’una coleutividá que representa lo opuesto a les propies convicciones.
Col envís de qu’estes persones puedan regularizar la so situación y evitar que les confesiones relixoses llogren provechu de la so pasividá ye posible exercer el llexítimu drechu a l’apostasía, ello ye, la refuga esplícita de la fe nuna relixón. Dende CSA La Xusticia coscientes de la demanda social qu’esti actu tien pente la ciudadanía asturiana, pero tamién de la dificultá d’animase a enfrentar a soles el procesu, proponen acudir en comuña al arzobispáu y allí non solo apostatar, sinón solicitar un documentu qu’acredite l’abandonu de la fe.
Los pasos a dar son cenciellos: pidir una partida de bautismu na parroquia na que se foi bautizáu -recomienden nun decir pa que ye pa evitar torgues innecesaries-, facer una copia compulsada del DNI -compúlsentela na Casa Conceyu- y pasar pola CSA La Xusticia. La primer fecha que ta plantegada ye esti vienres, 19 de Xunetu, pero nun descarten crear nuevos grupos pa la xente que nun pueda acudir.
Nuria Prendes
This work is licensed under a Creative Commons Attribution 4.0 International License.
