Ayeri mesmo una delegación de la Federación Asturiana Memoria y República acurdieron a la Xunta Xeneral y a la Presidencia de Gobiernu pa presentar oficialmente la propuesta
FAMYR y l’Atenéu Obreru de Xixón, col sofitu de 27 asociaciones y partios políticos -pente los qu’alcontramos a Andecha Astur, el PCE, IU d’Asturies o Podemos- soliciten la concesión de l’entítulu de “Fios Predilectos d’Asturies” a los guerrilleros antifranquistes Cristino Garcia Granda, Felipe Matarranz y Juan Antonio Alcalde y la “Medaya d’Oru d’Asturies” pal caberu superviviente asturianu de los campos de concentración nazis, D. Vicente Garcia Riestra.
Pa estes asociaciones urxe un reconocimientu de la llucha pola llibertá de los defensores del llexítimu réxime republicanu, comu se fizo n’otros países comu Francia, Alemania o Rusia, pente otros. Nesi sen, René Pérez, responsable de la Unión d’ Escombatientes Franceses n’España, revindicando la reparación de esta inxusticia, afirma que “A los guerrilleros franceses que llucharon contra’l nazismu considéraseyos héroes nacionales; tienen una pensión especial, los mutilaos reciben asistencia a domicilio y foron condecorados en repeties ocasiones.”
El reconocimientu de “Fiu predilectu” dase a persones ñacies n’Asturies destacables polos sos méritos. La campaña pol reconocimientu de los dos guerrilleros antifascistes asturianos, Cristino García Granda y Jose Antonio Alonso “Comandante Robert”entamó ya nel 2010, pero pesi a ser respaldada por más de 2.000 robles y 72 organizaciones, fue desestimada pol “Principado”, que decidió entregaila al entos xefe de la Casa Real d’España, Alberto Aza Arias. N’años anteriores foren galardonaos l’es-secretariu de la Casa Real Sabino Fernández Campo (1991) ya’l Príncipe de Asturias (1986).
En 2013 FAMYR, xunto cola Asociación pa la creación del archivu de la guerra civil, les brigaes internacionales, los neños de la guerra, la resistencia, la guerrilla y l’esiliu español (AGE) y Asociación de Descendientes del Esiliu Español retomaron una nueva campaña, estendiéndola a tolos guerrilleros y resistentes antifascistes asturianos que queden vivos, seique enterraos nel escaezu. El Gobiernu asturianu presidíu pol “socialista” Javier Fernández desestimó la petición.
Dende FAMYR denuncien que l’estáu español sigui dando a estos heroes la consideración de bandoleros y terroristes, dientro de la tradición d’etiquetar con esi apelativu a cualisquiera que lluche poles llibertaes ya escontra’l so sistema, calteniendo vixentes les sentencies condenatories franquistes.
Redaición InfoAsturies
This work is licensed under a Creative Commons Attribution 4.0 International License.
