Varsovia, Turín, Cracovia o París son dalgunos de los puntos encarnaos, xunto con Xixón, del mapa espublizáu pola revista ‘Journal Atmospheric Chemistry and Physics’, comu los llugares nos que s’espera que d’equí a 11 años la polución seya mayor. Pa facer los calculos, los espertos participantes nel estudiu, que pertenecen al Istitutu Internacional d’Analís de Sistemes Aplicaos, n’Austria, midieron la contaminación actual con datos apurrios por 1870 estaciones de monitorización del aire, ellaborando con ellos una previsión de cuáles serán les ciudaes con más polución en 2030.
Los autores del informe nun lo duden: “el fumu tósicu ta lloñe de desapaecer del continente”. De fechu, cola llexisllación actual y si nun se ponen en marcha darréu midies estra, son abondes les fasteres europees que veran comu los sos niveles de contaminación atmosférica continuen medrando perriba de les llendes afitaes pola Organización Mundial de la Salú y la Xunión Europea.
Pente les fasteres que más esmolecen, l’estudiu señala l’este d’Europa, col sur de Polonia y Bulgaria comu principales focos, xunto con grandes ciudaes comu Estocolmo (Suecia), París (Francia), Turín (Italia) Stuttgart (Alemania) y Xixón (Asturies). Esta cabera amuésase comu la más contaminada del estáu español.
Redaición InfoAsturies
This work is licensed under a Creative Commons Attribution 4.0 International License.
