El documental, col osu pardu como principal protagonista, presentóse ayeri al públicu y veráse en cines de magar el 31 de marzu

Rodada pola productora Wanda Films esti documental, dirixíu por Joaquín Gutiérrez Acha, recueye espectaculares imáxenes de los paisaxes, la flora y la fauna de los más de 400 Kms de barrera natural que dixebra la costa Cantábrica de la meseta. Viesques, peñes y regatos son l’ablucante escenariu d’una hestoria cercana y cotidiana, pero non por ello menos impresionante, la de la vida na cordelera Cantábrica.

Dos llargos años de rodaxe pelos montes y medios téunicos perriba de lo avezao –incluyendo drones y tomes  dende helicópteru- foron precisos p’algamar esti resultáu, d’impecable calidá tanto d’imaxe como de soníu.

Esta película aporta a les pantalles nel meyor de los intres, como una llamada d’atención so la guapura y bayura d’un entornu que ,nos caberos tiempos, paez puestu en pelligru pola llocura d’unos ya’l desdexamientu d’otros. Veremos a los osos y llobos nel so llar, pente peñes y Viesca, non escolingaos de señales nin envelenaos nes caleyes y al gallu montés canciar ensin decatase de qu’igual ye ún de los caberos. Quiciás viéndolos na gran pantalla nos decatemos de la importancia de defender el país de la contaminación que lu envelena y a los moraores que lu comparten con nos d’una muerte ensin xacíu.

Clicar equí pa ver trailer de la película.

This work is licensed under a Creative Commons Attribution 4.0 International License.