Van 82 años de  la proclamación de Soberanía del Conseyu d’Asturies y Llión pola que s’ independizaba a tolos efeutos de la República Española, costituyéndose nuna República Asturiana y entamando un procesu hestóricu que-y valió  la so reconocencia a nivel internacional y nel que los asturianos defendieron heróicamente’l so territoriu coles armes frente al exércitu franquista español y los sos alliaos alemanes ya italianos, pero que, como recalquen dende A.A., nun cuntó nunca cola aprebación de la República española, “que llegó a considerar un alliviu l’acupación d’Asturies poles tropes facistes.

L’actu,  tendrá llugar el sábadu 24 d’Agostu nel Puertu Tarna y tendrá dos partes estremaes: A les once xubiráse a les trincheres dende onde l’exércitu del Conseyu Soberanu defendió’l país frente a les tropes franquistes, y a les 13:30 tendrá llugar l’homenaxe propiamente dichu, delantre’l monolitu que fai alcordanza d’esta hestórica declaración. La cellebración finará con una xinta popular na Fonte la Nalona.

Na so convocatoria A.A, tamién quier facer remembrar el fechu de que los asturianos nun pudimos decidir democráticamente la nuesa forma de gobiernu actual “La falsa transición política cola que continuó’l franquismu non solo nun permitió recuperar esta auténtica istitución d’autogobiernu, sinón qu’impunxo –ensin que’l Pueblu Asturianu pudiere votalo- un “Principado” y un Estatutu descontestualizáu hestoricamente y sociolóxicamente ayenu a la sociedá asturiana, condergándomos a la situación de colonialismu que carecemos anguañu.”