Cerca de 1.300 muyeres precisen proteición n’Asturies y la cifra medra diariamente con dos o más casos nuevos, entantu les cases d’acoyida tan ocupaes al cien por cien
Cuntar con un llugar a onde dir ye una condición importantísima a la hora de dar el pasu d’allonxase del agresor: una llamada al 112 o al 016 redirecionará a la víctima de manera anónima a la Casa Malva, onde sedrá atendía por un equipu d’espertes y acoyía nuna de les viviendes habilitaes pa esi fin. Asturies cuenta con 3 cases d’acoyía y 20 pisos tutelaos, repartios pente Xixón, Uviéu, Avilés, Castrillón, Valdés y Llangréu. Toos ellos tan ocupaos esti branu al cien por cien, con más de 80 unidaes familiares (muyeres colos sos fios y/o persones dependientes al so cargu) abellugaes nellos. La residencia nestos cientros ye temporal, como pasu a una vida independiente y segura, pero entá asina hai intres del añu (comu agora) nos que nun algama a cubrise la demanda.
En total 243 muyeres y 213 menores precisaron vivir en dalgún momentu nuna d’estes viviendes a lo llargo l’añu pasáu, pero non toes presentaron denuncia contra’l so agresor: un esmolecedor 30% refuga acudir a la policia a la gueta de proteición o xusticia.
D’ente les 70% que presenten denuncia, son cerca de 1.300 los casos activos agora mesmo n’Asturies, un cómputu total que s’avera a les 12.000 muyeres de magar el 2.003 -cuando entamaron a facese públicos los datos-. Tamos falando esclusivamente de casos nos que l’agresor caltién una relación sentimental cola víctima, escluyendo los casos de familiares, conocíos o desconocios y escluyendo tamién les violaciones y abusos sesuales. Nesti caberu ámbetu hebio 3 denuncies en namás 27 hores, dos d’elles en Xixón.
De les muyeres baxo proteición, non toes tienen el mesmu nivel de seguridá, que va dende l’encarcelamientu del agresor, dica el cenciellu seguimientu del casu, pasando pola pulsera de detección -p’asegurar la llonxanía- o la proteición integral de la víctima, en función del gráu de “riesgu percibíu”.
Acordies el caberu informe de la Delegación del Gobiernu pa la Violencia de Xéneru, les cifres medren rapidamente y les cases d’acoyida nun dan pa más, mientres los casos reconocios pol “VioXen” sumen 2 o más muyeres con necesidá de proteición ca díe: un total que ronda los 1.300 casos activos a díe de güei ya un cómputu total de cerca de 12.000 muyeres de magar el 2.003, cuando entamaron a facese públicos los datos.
Resalta la vulnerabilidá de les foriates: la proporción d’agredies d’otru país, el 30%, ye muncho mayor que la so presencia n’Asturies. La media d’edá ta nos 35 años, pero va baxando, siendo tanto los agresores comu les víctimes ca vegada más mozos; de fechu pente los casos con siguimientu n’Asturies hai 10 menores d’ente 14 y 17 años pente les protexies. Les más vieyes tampocu se llibren: 38 agredies tienen 65 o más años.
Llucía F. Marqués
This work is licensed under a Creative Commons Attribution 4.0 International License.
