L’Asamblea de Trabayadores en Llucha criticaron los Cursos de la Granda “un clásicu chiringuitu braniegu onde tolos años repiten el mesmu tipu d’intervenciones, protagonizaes pol mesmu tipu de conferenciantes”
La presencia de Pablo Hernández de Cos, Gobernador del Banco deEspaña, entidá que xuega un papel decisivu en toles polítiques d’axuste neolliberal contra los trabayadores adoutaes polos gobiernos del PP y PSOE, foi el cientru de les protestes entamaes polos trabayadores, que denunciaron por inmoral la campaña del mesmu contra la xubía del salariu mínimu a 900 € “mientres elli cobra 14.000 € al mes que salen de los nuesos impuestos, pa trabayar al serviciu de la Banca, la Gran Patronal y de los Fondos Utre con residencia en paradisos fiscales“.
L’Asamblea de Trabayadores en Llucha remembró que, pesi al fracasu de toles sos previsiones, el Banco de España sigui calteniendo la so demanda de más retayos y privatizaciones y de nueves reformes llaborales qu’abaraten el despidu, amás de ser cómplice activu na corrupción na xestión de les Caxes d’Aforru comu pasu previu a la so privatización -comu ye’l casu de CaxAstur, agora Liberbank. Acusaron tamién a la entidá de ser responsable del desaniciu que carez Asturies “El permanente servilismu del Banco de España a los grandes poderes financieros y especuladores, colos sos planes d’axuste neolliberales, llevónos a una situación d’emprobrecimientu de les grandes mayoríes, destrución d’emplegu estable y perda de drechos coleutivos de la qu’Asturies ye exemplu”
Dende la organización de los Cursos de la Granda punxéronse autobuses de baldre pa facilitar la presencia de públicu na intervención d’Hernández de Cos; dalgunos d’ellos viaxaben con namás dos persones dientro.
Redaición InfoAsturies
This work is licensed under a Creative Commons Attribution 4.0 International License.
