Los intérpretes de llinguaxe de señes alvierten de que’l serviciu d’atención a los neños con problemes d’audición nun ta garantizáu nes escueles asturianes

A una selmana escaso del aniciu del cursu escolar, el serviciu d’interpretación de llinguaxe de señes nun ta contratáu más que pa quince díes, del 19 de Setiembre al 2 d’Ochobre. Más pallá, desconozse si estos neños cuntarán o non cola atención imprescindible pa les sos necesidaes especiales.

Pa los profesionales, un de los problemes que motiva esta falta de tresparencia y estabilidá alcuéntrase nel fechu de qu’esti serviciu, pesi a ser un sofitu educativu, nun tien calter públicu. Fasta’l mayu pasáu la contratación d’intérpretes n’Asturies corría a cargu d’una empresa privada, la responsable de los actuales contratos, pero l’ausencia d’una nueva llicitación a díes del entamu del cursu fae temer pol serviciu. Los trámites burocráticos de llicitación y la posterior contratación podríen retrasar la cuestión a bien entráu l’añu escolar. Los trabayadores piden que’l serviciu seya públicu pa evitar que se repitan estes situaciones.

Redaición InfoAsturies

This work is licensed under a Creative Commons Attribution 4.0 International License.