Depués del ésitu de la campaña y marcha “Asturies nun tien rei” que l’añu pasáu consiguió xunir a bona parte de la sociedá asturiana nun mesmu actu nel que se desixía p’Asturies un futuru republicanu, Lluchando pola Soberania convoca pa esti Díi de la Nación Asturiana un programa de dos díis baxo’l llema “Tiempu de Nós”
El mesmu 8 Setiembre ta convocáu n’Uviéu un manifestamientu que saldrá d’al par del Reconquista a les doce y media del mediu díi, con final na Plaza’l Paragües, onde tendrán llugar talleres y actividaes. Pal llunes 9 (festivu) el mesmu coleutivu entama una marcha pel monte a Peñaflor, con salida a les 10:30 del apiaderu de Gráu.
Seique la convocatoria surde de Lluchando Pola Soberanía, sofiten la mesma delles asociaciones d’estremau calter, comu les Marches de la Dignidá, Bujarra Asturies, Andecha Astur, Darréu, Ruxerrux, CSI, Mocedá Comunista y otres munches que tarán presentes y collaborarán nos actos del domingu.
L’espaciu xuntariu Lluchando Pola Soberanía aconceya a delles organizaciones de calter soberanista col enfotu de valir de puntu d’alcuentru y d’axuntar nun mesmu marcu a les persones de sensibilidá soberanista baxo un mesmu paragües, entamando actos nes distintes feches de reivindicación del calendariu asturianu, comu ye’l 8 Setiembre y participando en munches otres movilizaciones.
Llucía F. Marqués
This work is licensed under a Creative Commons Attribution 4.0 International License.
