El nomamientu del escritor y editor Anton García al frente de la Direición Xeneral de Política Llingüística divide la opinión pública pente los que lu definen comu gran defensor de la llingua asturiana y los que lu acusen de “mercaor de voluntades” por remanar les perres destinaes a la llingua pal so porgüeyu y de beneficiase de facilidaes a la hora d’algamar sovenciones

Hestóricamente, la figura d’Antón García vencéyase al ñacimientu mesmu de la escolarización del asturianu, cuando les diferencies pente l’ALLA y la Conseyería d’Educación lleven a dimitir del so cargu a Xose Antón González Riaño y a Pablo Manzano, representantes de l’Academia la Llingua, por considerar que nun se taben faciendo bien les coses. El tercer representante de l’ALLA, Felix Ferreiro, abandona la posición de l’Academia y pasa a formar parte de la Oficina de Política Llingüística, que, con Faustino Álvarez al frente, carez una fuerte oposición por parte’l profesoráu, que llega a boicotear les sos midies.

D’esta confrontación ñaz, en tiempos del socialista Pedro de Silva, el Serviciu de Política Llingüística, y al so frente ye nomáu Antón García, ñaciendo asina la primer polémica: l’escritor nun cuenta colos requisitos llegales pa desendolcar esi puestu, al nun tener naquel intre una llicenciatura. El sindicatu d’Ensiñantes SUATEA entama entós una recoyida de fondos pa sacar alantre una querella a la so contra, na que participen renomaos axentes de la cultura asturiana de la dómina, incluyendo académicos, escritores y profesores. Sicasí, nun movimientu poco claru, la sentencia reconoz que nun cumple les condiciones pero falla a favor d’Antón García, que continúa nel puestu. Décide nun recurrise la sentencia y Antón queda al frente del SPLL.

Demientres el tiempu que ocupó esi cargu, sigún los sos detractores, destacó pola so habilidá pa “mercar voluntaes” y repartir beneficios, creando una rede clientelar al rodiu que llavó la so imaxen. La continua -y descomanada- concesión de sovenciones a la editorial fundada por elli, Trabe, tamién foi motivu d’espirica, tratando de desviar la so responsabilidá pasando’l cargu de direutor de la mesma a la so muyer, Consuelo Vega, y faciendo lluéu un “trespasu” de la editorial p’allonxase de les sospeches de prevaricación que recayíen sobre elli.

La so posición respeuto a la llingua queda espeyada en delles entrevistes concedies a lo llargo los caberos años, nes que reconoz que ve al asturianu comu “llingua minoritaria en trance de desapaición” y resta importancia a la oficialidá, de la que dixo testualmente que “La oficialidá, ensin interés social pola cuestión, ye un simple papel y amás llevo trenta años convencíu de que ye asina”.

Redaición InfoAsturies

This work is licensed under a Creative Commons Attribution 4.0 International License.