Ca vegada son más los trabayadores que s’incluin dientro del 20’9% de la población que s’alcuentra nesta situación d’estrema precariedá, seique’l mayor incrementu dase en families con necesidaes materiales severes
Los datos apurrios pol Istitutu Nacional de Estadística (INE) a traviés de la encuesta de condiciones actuales de vida alluguen la tasa de riesgu de probitú o esclusión social d’Asturies nel 20,9%. Namás 3 países de la Xunión Europea sobrepasen esta cifra: Rumanía, España y Grecia.
El xorrecimientu de la probitú, d’un 0’2% nesti caberu añu, ye esmolecedor por marcar una tendencia a l’alza cuando ya nel 2007, con dos puntos y mediu menos, se falaba d’emerxencia social-. El 9’1% de los llares asturianos tien serios problemes pa poder asegurase l’alimentu a fin de mes y cerca del 21% ta en riesgu d’esclusión social, una situación que non solo implica dificultaes pal díi ente díi, sinon que alluga a les persones que la carecen nun puntu de díficil retornu: una y bones se pierde l’acesu a cuestiones comu ropa curioso, vivienda fixa, agua o inclusu teléfonu ya interné, consiguir un trabayu que permita salir de la situación faese abegoso.
Sicasí, los caberos datos apunten a qu’un contratu llaboral ye ca vegada menos determinante a la de salir de la probitú: munchos de los asturianos que nun tienen pa vivir dignamente son asalariaos: nesti país hai persones durmiendo na cai que se llevanten por dir a trabayar por menos de 500€.
Comu d’avezu, la pior parte llévenla les families monomarentales y les muyeres de más de 65 años.
Llucía F. Marqués
This work is licensed under a Creative Commons Attribution 4.0 International License.
