Asturies alienda nun constante estáu d’esceición ambiental nel que les midíes perriba lo permitío pa la salú tórnense’n cotidianes

Llucía Fernández Marqués

Continuos escapes n’Arcelor, provocando xorrecimientos de la polución en Xixón, fasta un 4.000% perriba de lo considerao afayaizo pa la salú humana pola OMS (esti mesmu martes una nube tósica xubió los marcaores un 1.400% percima lo aceutable).

Alarma por concentración de partícules (PM10 y pm5) en toles estaciones midiores de les cuenques.

Ósidos de nitróxenu perriba de lo permitío con datos de 341 µg/m3 , frente a los 40 µg/m3  másimos oficialmente aceutables pa la vida, en Gozón, onde tamién saltaron les alertes por escesu de PM10. Simultaneamente, alarma por estes partícules tamién en Castrillón, Corvera, Avilés y Piedres Blanques.

Disparada la contaminación en tola Área Metropolitana d’Uviéu, qu’abarca los conceyos d’Uviéu y Sieru, tantu por partícules como por bencenu.

Arramaos d’Arcelor  producen la muerte de centenares de pexes, ensin que se tomen amueses de los arramaos nin s’impongan sanciones.

Estes y otres alertes asemeyaes saltaron a lo llargo de los últimos tiempos ensin que provocaren nenguna reacción eficiente per parte de les alministraciones pa protexer a la población, tantu la humana como l’animal y la vexetal-.

Les que si reaccionaron foron les cifres d’ingresos hospitalarios, una y bones los picos de contaminación atmosférica disparen los ingresos hospitalarios n’Asturies por enfermedaes respiratories, d’alcuerdu a un estudiu epidemiolóxicu realizáu pola conseyería de Sanidá.

Como datu interesante, con rellación cola contaminación entá por demostrar: tán sumiendo los gorriones de les nueses cais. Yo tomaríalo como un avisu.

Pa más información so la contaminación n’Asturies y los sos efeutos, ver la Piqueña guía de contaminantes.

This work is licensed under a Creative Commons Attribution 4.0 International License.