Mari, viuda d’un mineru, lleva tola vida -50 de los sos 72 años- viviendo na so casa en La Camocha y nella crió a los sos 10 fios. La so salú nun ye bona, pente otres complicaciones va pasando por tres ictus, dos d’ellos dende l’aniciu del procesu. Esta mañana el de so diba ser el primeru de los 37 desfiucios del pobláu mineru, pero foi paralizáu pola solidaridá ciudadana

A les ocho la mañana aportó’l primer coche de la Guardia Civil a echar a Mari de la so casa. Pa entós los vecinos y vecines ya taben na puerte, esperando pa frenar el desallugu. A lo llargo de la mañana la xente que se foi averando dende tol conceyu foi a más y quedó claro que nun diben a echar a esta muyer a la cai ensin brenga. La tensión afeutó a Mari, de salú ya delicao, y foi necesario llamar al SAMU pa que l’atendieren, pero tampocu eso foi abondo pa echala. A les 10 de la mañá los axentes de la llei abandonaben el pobláu y dábase la noticia: desfiuciu paralízáu.

Esta batalla ganáronla los ciudadanos y la PAH, pero nun sedrá la cabera: tornarán a ca Mari y tornarán a les otres 36 viviendes menaciaes, munches d’elles moraes por xente mui mayor que pasaron ellí la so vida y cuntaben pasala allí fasta’l final, conforme al contratu vitaliciu que firmaren al arrendar y que quedó invalidáu col preslle de la mina.

Agora acúsenlos de nun pagar l’IBI, pero tampocu yos dan la oportunidá de pagalu “paguélo y devolviéronmelo, lo qu’ellos quieren ye echanos  d’equí” aporfia Mari, que nun dexó enxamás un mes d’alquiler ensin pagar. “Si me quieren sacar d’equi va ser muerta” alvierte.

Llucía F. Marqués

This work is licensed under a Creative Commons Attribution 4.0 International License.