La emigración forciada nun perdona a naide nin a nada, lo mesmo que’l desdexamientu y la desidia de les istituciones asturianes. La Xata la Rifa lleva 8 años moviendo la escena cultural y artística asturiana namás -nunca meyor dicho- por amor al arte; pero alvierte: ya nun puede más, si nun recibe en breve un sofitu colará, y Asturies perderá con ella otra más d’esos miles de moces y mozos con talentu que nun tienen más remediu que colar pa salir alantre. Asturies quedará un pocu más erma
Garrao del Facebook de La Xata La Rifa
A quien correspuenda o se sienta aludíu:
Entamo por Conseyería pero voi dir comarca per comarca y conceyal per conceyal, voi visitar programadores y responsables culturales. HOLA, esto ye una despidida:
La mio situación como artista y promotora d’eventos y distintos texíos artísticos, ye bastante llende n’Asturies.
llevamos años creando dende’l vacíu y de cero: Llaboratorios artísticos en mediu rural, trabayos escénicos col territoriu, recuperación d’espacios y puesta en valor del padremoñu ya’l paisaxe pa eventos, Festival de la xata La Rifa, Xires flotantes, alcuentros pedagóxicos y otres formes d’espresión van dándose al traviés d’esta coleutividá artística, con muncha maxa, creatividá, persistencia y tesón, nun viaxe por distintos pueblos, la cultura y l’hestoria, poniendo focu nos artistes locales, con proyeición nacional ya internacional, sol dengunéu de les istituciones que respuenden pola cultura n’Asturies. Y yá nun podemos más.
Quiero alantrar que si nesti mes nun atopo una decisión o voluntá per parte les alministraciones d’atopar un camín pol que se produza un vraeru cambéu a esta situación de precaridá, voi pone-y fin a 8 años de Festival de creación escénica y de milagros, pues nun atopo los sofitos mínimos, abondos nin necesarios por que esto siga palantre dignamente, fora d’un esfuerzu descomanáu d’una llista infinita de persones.
Empecipio una campaña fuerte escontra l’esiliu, como motor de La Xata y como artista, y de xacíu nun voi ser la primera nin la postrera en fuxir, pero gustaríame poder llanzar una pidición d’auxiliu per cabera vegada y que nun seya por nun intentar el diálogu y la comprensión mutua nuevamente.
Teo les razones, l’enfadu y la fuercia, y ye l’intre de que’l mensaxe llegue, o a lo menos se sepa que ta llanzáu.
Y nun va pasar res, la Lluna va siguir tando atrapada a la Tierra.
Y yo nella.
This work is licensed under a Creative Commons Attribution 4.0 International License.
