Berta Piñán diríxese a la Xunta n’asturianu. Mándenla callar. Sabía que la diben mandar callar. Calla. Entama a falar n’español. La presidencia de la sala, del PSOE, nun intervién pa garantizar los sos drechos. Un casu más pente miles d’asturianos que, al ser reprimios, prefieren camudar a la llingua impuesta qu’enfrentase a un sistema que, nel casu de Berta, foi afitáu pol mesmu partíu qu’ella representa
La campaña mediática ya ta perdayuri, cola correspondiente, llóxica y xustificada indignación: que Berta nun pudiere falar na so llingua nel so trabayu ye un abusu de poder, una nidia violación de drechos, una aición colonialista represora ensin esculpies… sicasí cabe entrugase ¿Porqué? ¿D’aú surde esa represión?
Como nel cuentu’l cazaor cazáu, el represor reprimíu prefier facese la víctima anantes de reconocer, nesti casu, que foi el PSOE el que creo les bases pa esti abusu.
Asina polo menos lo ven dende Andecha Astur, que nun duden en recalcar “d’aquellos vientos, estes turbonaes”, aludiendo a la infinidá de represiones y microrepresiones que’l PSOE permitió, afaló y protagonizó nes caberes décades. “Consideramos que’l silenciamientu -rápidamente acatáu- de Berta Piñán nesun ye sinon la consecuencia de la falta de drechos y llibertaes que los asturianos carecemos a diario y de continuo, que son al so tiempu consecuencia direuta de les polítiques aplicaes añu tras añu pol PSOE“.
La organización nacionaliega ye una de les que, por mor del so compromisu, más careció esta represión: votos llegales anulaos por tar les papeletes n’asturianu, dificultaes pa presentase a les elleiciones por usar la propia llingua, documentos refugaos por tar escritos n’asturianu… tou ello baxo’l mandatu’l PSOE y cola aquiescencia y silenciu cómplice de los mesmos qu’agora, ante l’enésimu intolerable ataque a la llingua, reacionen echando les manes a la tiesta.
Sicasí, nun son los únicos: a los escolinos y universitarios asturianos, ensin dir más lloñe, tórgaseyos usar la so llingua a diario, neto que a cientos de trabayadores nel desendolcu’l so trabayu, especialmente aquellos que tan cara al públicu. Presentar un documentu n’asturianu, pesi a ser llegal, riquier un convencimientu y un valor emportante, los problemes tan aseguraos. l’asturfobia ta ehí, pa toos ya en tolos ámbetos, afitada y caltenida poles polítiques llingüístiques vixentes, pola falta de desendolcu y l’ausencia de cumplimientu de la Llei d’Usu y Promoción, pola falta d’Oficialidá.
Nuria Prendes
This work is licensed under a Creative Commons Attribution 4.0 International License.
