Unes casetes informatives allugaes n’estremaos puntos de la ciudá ufren asesoramientu a los viandantes sol plan, qu’entamará l’añu que vien
Llucía Fernández Marqués
N’Uviéu la recoyía de residuos va un pasu más pallá y de magar l’añu 2.018 entamarán a separtar, arriendes del vidriu, plásticu y papel, los restos orgánicos. Pa ello ye preciso concienciar a la población de la importancia de minimizar la produción de basoria y de los aprofitamientos que pueden tener estos materiales.
El nuéu contenedor sedrá de color marrón ya’l sistema de recoyía sedrá asemeyáu al de los otros materiales reciclables, pero de magar entós el procesu sedrá estremáu, ya que dirán na so cuasi totalidá a la produción de compós
caún de nosotros xeneramos de media 1.5kg de residuos cada díe, de los que pente un 45% a 50% ye materia orgánico, ello ye, compuestos que provienen de los restos d’organismos que tuvieron vivos, tales como plantes y animales y los sos productos de desfechu.
El reciclaxe d’estos residuos permitirá cumplir cola direutiva europea “Estratexa 2020” qu’establez que para esi añu, al menos el 50% de la basoria que se recueye na Xunión Europea, tien de tar escoyía pal reciclaxe.
L’Ayuntamientu d’Uviéu nun repara en gastos no que cinca a dar publicidá a esti proyeutu, aparte de la so implantación propiamente dicha, el coste de la campaña publicitaria asociada a esti proyeutu asciende a 96.775 euros, incluyendo la contratación de banners na prensa dixital, publicidá na prensa convencional, cuñes en radiu, mupis y cartelería, publicidá en 12 autobuses urbanos, un videu en redes sociales, buzonéu d’un folletu informativu acompangáu d’un sobrín de semiyes de flores, un stand informativu en 22 llocalizaciones de la ciudá, 40 charres informatives, un “showcooking” de cocina sana ya esin residuos ya un espectáculu de cai interactivu ‘Odisea na basura’. Arriendes d’ello, la ciudadanía participante nestes actividaes recibirá como un tiestu biodegradable con semiyes de petunies o un llapiceru con semiyes qu’al final de la so vida útil se convertirá en planta arumosa.
This work is licensed under a Creative Commons Attribution 4.0 International License.
