Neños y neñes corriendo, pintando, lleendo, xugando, deprendiendo a grabar vidios o a montar n’skate. Families acomuñaes, pas y mas ballando cola reciella, cuntando cuentos, canciando. Xintar en práu, pañar fueyes, xugar al baloncestu o al dominó, llanzar aviones de papel o persiguise pente los árboles. Vivir. Porque d’eso se trata Reciella: de vivir n’asturianu, de ser n’asturianu
Comu tolos años, nesta edición de Reciella abondaron los abrazos y les sorrises, la música, los tallerinos, los llibros y los collores, creando esi especial ambiente acoyedor que dexa a la reciella -y a los mayores- con ganes de más.
Cada añu son más les families que s’averen al entamu la seronda pa esfrutar d’esti espaciu seguru p’asturfalantes, onde la llingua que los neños sienten seya la mesma que falen en so casa, onde los mayores y les coses prestoses que los arrodien falen asturianu y naide yos vaiga dicir que nun los pescancien nin que falen mal. Pero tamién son ca vegada más les families entá non asturfalantes que s’averen a Reciella pa que los sos fios tengan la oportunidá de conocer l’asturianu, de dir deprendiéndolu y d’esfrutalu, coscientes de que pa ellos sedrá una mayor riqueza y una erbía emportante de comunicación y conocimientu del país nel que viven.
Nun país nel que la población infantil ye ca vegada más escaso, cada neñu y cada neña son un preciadísimu mediu de caltenimientu y tresmisión, cada familia, indispensable na so llabor de criar n’asturianu. Echando una güeyada ayeri al Pueblu d’Asturies alendaba ún con más esperanza: l’asturianu -y poro, Asturies- tien un futuru.
Llucía F. Marqués
This work is licensed under a Creative Commons Attribution 4.0 International License.
