Nes sos declaraciones posteriores acusó l’actu de ser sectarista “porque promueve a les escritores y non a los escritores” y reconoció que la falta d’Oficialidá ye una cuestión esclusivamente política y non llingüística, al afirmar que “tan utilizando unos espacios equí na Xunta pa dar un calter políticu a un actu istitucional”

Na so intervención, la vicepresidenta de L’Academia de la Llingua, remembró qu’entá hai muncho que revindicar y que nagua por que seya llibre l’usu del asturianu “en toles situaciones públiques, privaes y na Xunta’l “Principado””.

Nun sabemos si foi la mención de la pallabra revindicar o’l conceutu “drechu” implícitu nes sos pallabres lo qu’ofendió a la diputada de Vox y la forció a abandonar la sala, seique albidro que’l fechu mesmu de que falare n’asturianu ya foi abondo pa que se sintiere atacada. Ya anantes de que Marta Morí abriere la boca resquemaba-y la esistencia d’una vicepresidenta d’una Academia de la Llingua Asturiana que, dende va 39 años, fae imposible siguir diciendo que l’asturianu nun ye una llingua ensin quedar en ridículo.

Estorbó-y el fechu mesmu de que l’asturianu esista, de qu’Asturies aliende, que los asturianos temos equí y que tengamos la desvergoña de facenos sentir -que osadía- na sede mesma d’una istitución que consideren parte’l so sistema. Nun hai dubia que se sintió menaciada. Tien motivos pa ello: la esistencia de presones que defiendan la cultura, la identidá y les llibertaes choca de frente cola so visión d’esa España cañí, colonialista y dictatorial a la que tantu ciñu tienen en so partíu.

Que marche, si, pero que preslle la puerte al salir.

Llucía F. Marqués

This work is licensed under a Creative Commons Attribution 4.0 International License.