Malpenes unos cientos de persones recibieron a la familia real española a la so llegada a la catedral, ya’l conciertu al qu’acudieron pela tardi tuvo acompangáu d’actos franquistes nel esterior, nos que se canció el cara al sol faciendo’l saludu facista
La esperada receición de les sos maxestaes na primer visita de la heriedera del tronu nun tuvo la sonadía qu’esperaben. Sicasí, güei l’avezada manipulación propagandística del rexime amuesa semeyes d’una plaza apinao de xente recibiendo a los reis pente decenes de banderes d’España. Dexando a un llau que les banderes les dexó puestu’l conceyu d’Uviéu comu decoración previa al eventu, la realidá -comu recueye la semeya tomada dende l’ángulu opuestu- yera una plaza vacía colos pocos asistentes estratéxicamente colocaos en primera fila pa dar impresión de multitú.
A la tardi los reis acudieron al Auditoriu Príncipe Felipe, pente descomanaes midies de seguridá. La fuerte presencia policial, sicasí, nun torgó a los nacionalcatólicos de la Hermandá de Defensores de Oviedo llevar a cabu el so actu facista, delantre la virxe que decora l’esterior de la Ilesia de la Xesta, a unos metros del Auditoriu. Un garrapiellu de neonacis facíen el saludu facista entantu canciaben el “Cara al sol”, llanzando conseñes a favor de la xunidá d’España y glayando “Viva Franco” ensin que’n dengún momentu la policia interviniera pa detener l’actu. Na so páxina los defensores reconocen la presencia de “compañeros” venidos dende Sevilla y otros llugares d’España pa la ocasión.
La Xesta ye un edificiu nel que, curiosamente, nun s’aplica la Llei de Memoria Hestórica, tando estrada de simboloxía facista tantu nel so interior comu el so esterior.
This work is licensed under a Creative Commons Attribution 4.0 International License.
