El clú Patín Sieru ye’l más antiguu d’Asturies n’esti esporte y yá en Mayu d’esti añu foi renomáu por algamar 9 medayes d’oru nel campionatu estatal

L’ascensu vieno tres d’un duru entrenamientu -dos hores diaries- empobináu precisamente a algamar esta categoría, la más alta a nivel estatal. Nel 2018 plantegáronse esi oxetivu ya entamaron a camudar los entrenamientos en consecuencia. Nel primer añu algamaron ya un bon puestu: quedaren en cuarta posición.

Esti añu l’equipu, formáu poles ocho patinaores Miriam Prendes, Paula Corte, Carla Gutiérrez, Lara González, Nuria Rodríguez, Malena Sánchez, Olaya González e Irene Reyes, entrenaes por Alejandro Braña, entamó la temporada de segunda división con puxu: nes dos primeres xornaes, en Pamplona algamaron un segundu puestu na preba de 2000 metros relevos a la americana indoor, ya en Vitoria, onde tuvo llugar la tercer y cuarta xornada, ganaron la preba de 1000 metros sprint y metieron na final a tres correores de les ocho posibles, subiendo asgaya la clasificación del equipu. Los ésitos nun apararon nes vinientes xornaes, en Valencia (5ª y 6ª xornada) quedaron les primeres na preba de 100 metros sprint, y nes caberes xornaes, cellebraes en Galicia, remataron el palmarés con un segundu puestu mui disputáu na preba de relevos.

En resume, un añu de trunfos que yos valió pa entrar na naguada primera división.

Nel Dos Santos