Los Sidrocoles lleven doce años llevando a les escueles, mercaos y folixes del país el so llagarín portatil, col oxetivu de que neños y mayores conozan más de cercael procesu d’ellaboración de la sidre
Sidrocole na Feria de Balmonte
Esti añu la temporada d’escuela sidrera naguróse fuera de les aules: el primer Sidrocole foi parte de l’animación del Festival de la Güerta y del Pan d’Escanda de Balmonte. Demientres dos díes piqueños y mayores mayaron, prensaron y bebieron la sidre’l duernu. Si a la reciella yos prestó pola novedá, pa los más vieyos foi una oportunidá de remembrar tiempos pasaos, cuando nos pueblos de la rodiada se facía sidre n’andecha, esautamente col mesmu sistema que los Sidrocoles llevaron.
Los vinientes Sidrocoles nun fueron mui lloñe: el llunes los 118 escolinos d’ente 3 y 12 años del C.P. Obanca, en Cangas, pasaron pelos mayos, la mayaora y la prensa, participando con enfotu pa llueu esfrutar xuntos de la sidre’l duernu recien fecho por ellos. Ayeri, ensin salir de Cangas, tocó’l turnu al cole Alejandro Casona.
A partir d’agora, y nos dos meses vinientes, sedrá la temporada de mayor actividá pa los Sidrocoles, ya que anque los talleres sidreros impártense a lo llargo tol añu y pa xente de toles edaes, les feches escoyies pola mayoría de los colexos coinciden cola cellebración del magüestu.
Seique la mayada ye ensin dubia el taller más demandáu, siendo ello que ya queden poques feches llibres pal mes de Payares, Sidrocoles tien munches otres actividaes.Nel taller de pañar, los neños y neñes desplácense a una pumarada, onde amás de pañar la mazana conocerán les carauterístiques organoléutiques de les mazanes y detalles sobre les munches variedaes propies de mazana de sidre qu’hai n’Asturies.
Otres de les posibilidaes son visitar un llagar nel que se te mayando, pa ver en direutu l’aniciu del procesu sidreru, -acompangaos poles desplicaciones del llagareru y los monitores de Sidrocoles- semar un pebidal – dientro’l Plan de Recuperación Pomolóxica- llantar un pumar na escuela, o dar un tallerín d’echar sidre.
Los colexos, istitutos o asociaciones interesaos en participar en dalguna d’estes actividaes o n’algamar información, pueden ponese en contautu colos Sidrocoles nel teléfonu 684644711.
Redaición InfoAsturies
This work is licensed under a Creative Commons Attribution 4.0 International License.
