Acordies un reciente estudiu espublizáu por Nature Communications, el territoriu d’Asturies amenorgará por mar, sumiendo bona parte de los territorios costiegos del país anantes del 2050 si nun se tomen midies de proteición. La costa de Xixón, Navia, Avilés o Villaviciosa sedrán les más afeutaes

Los analistes de Climate Central espublicen un informe nel que se recueye la previsible xubía de la mar nos prósimos 30 años. L’ascensu l’agua afeutará a territorios en tol mundiu nos qu’anguañu viven 300 millones de persones. Acordies l’estudiu, el sudeste asiáticu sedrá’l más afeutáu, pero Asturies tamién carecerá les consecuencies. Bona parte de les sableres asturianes sumirán na mar anantes del 2050.

La de San Llorienzu, en Xixón, ya ta desapaeciendo aidada poles obres de El Musel, que camudaron les corrientes marines y tan desaniciando la sablera, pero tres d’ella vienen munches otres que verán amenorgada la so superficie

L’estudiu ta fechu utilizando una nueva ferramienta que recalcula la orografía más al detalle, alcontrando les zones más vulnerables al xorrecimientu de los oceanos. Los investigadores afalen a considerar los datos comu una oportunidá pa poner a tiempu midies, comu diques, que torguen l’ascensu l’agua o’l reallugamientu de viviendes en fasteres más altes.

Sableres comu San Antolín, Torimbia, Borizu, La Islla, Andrín, Barayo, Bañugues, Cueves, San Pedro, la Concha d’Arteu, Bañugues o Ballota, pente munches otres, desapaecerien o menguarien asgaya.

A nivel urbanu, el conceyu más afeutáu sedrá Xixón, tanto pol so tamañu comu pola so escasa ellevación sobre’l nivel de la mar. Les previsiones son ablucantes, cola mar anubriendo bona parte’l cientru, fasta les mesmes víes del tren. Poniente, cola so playa robada a la mar, desapaecería dafechu, igual que’l puertu deportivu, pero la peor parte ye pal barriu del Natahoyo, que vería comu desapaez el so Istitutu de Secundaria Emilio Alarcos ya’l cientru de F.P. Revillaxixéu. Edificios tan emblemáticos comu’l Muséu del ferrocarril, l’Acuariu o la sede’l periódicu El Comercio quedaríen baxu l’agua.

Avilés sedrá otra de les ciudaes mas afeutaes, coles orielles de la ría sumies, y sobre tou, cola inundación de la zona industrial ya’l Niemeyer. La ría de Villaviciosa dexarán tamién pasu a la mar, aportando a la Fonte los Caños,  y anubriendo bona parte’l cascu urbanu. Les desembocadures del Navia ya’l Nalón son otros puntos d’altu riesgu deteutaos por Climate Central.

This work is licensed under a Creative Commons Attribution 4.0 International License.