Llucía F. Marqués

Si te roben mientres durmes ye robu, y matar o pega-y una paliza a un durmiente nun esculpa al asesín. Si te violen, seique tengas 14 años, ya ye otra cosa… y sinón, miray que bien-y fue a la Bella Durmiente

La primer versión conocida de la Bella Durmiente foi escrita en 1634 Italia por Giambattista Basile y difería abondo de la versión de los Hnos. Grimm, escoyía por Walt Disney pa la so película. Nella, el noble qu’entra en castiellu y alcuentra a la Bella decide violala, aprofitando que ta incosciente y nun s’entera, dexándola preñada de ximielgos, que sedrán los que la despierten más alantre nel cuentu.

Quedémonos nesa primer parte. La violación -naide dudaría’n llamalo asina- de la princesa y la so dolcificación a un solu “besu d’amor” recuerda la sentencia’l casu de Manresa, contra la que mos manifestábemos ayeri. Con dalgunes desemeyances: la menor yera entá más neña que la Bella Durmiente, había una pistola pel medio y nun foi ún, sinón cinco, los violadores.

Sicasí la llei española diz que si la víctima taba incosciente, que si los sos atacantes nun necesitaron intimidala o violentala, y que, si nun hebio nin una cosa nin la otra, nun foi agresión nin violación, sinon abusu. Ignoren, al paecer, el Conveniu d’Estambul incluyíu nel BOE en 2014, que define como “violencia sesual” la penetración “non consentía” o “los demás actos sesuales non consentios”. Vamos, que con adurmecer a cualisquier persona ties drechu a facer lo que te pete con ella.

Ayeri los asturianos y, sobre tou, les asturianes, salieron a la cai a protestar por esa sentencia. Igual yera más útil camudar el marcu xurídicu que la permite, el sistema xudicial que la sustenta, el gobiernu que la consiente ya’l estáu que la respalda.

This work is licensed under a Creative Commons Attribution 4.0 International License.