El 85 por cientu de les reserves de Litiu del mundiu, necesariu pa la fabricación de bateries pa coches y teléfonos móviles, alcuéntrase en Bolivia, un recursu col qu’Evo Morales planeó decenes de proyeutos de desendolcu pal so pueblu, pero endemasiao codiciáu comu pa que’l sistema capitalista lu dexare en manes d’un indiu d’izquierdes

Ayeri los asturianos tornaron a amosar la so solidaridá pa col pueblu bolivianu, la so refuga al güelpe en cursu en Bolivia y pol restablecimientu urxente del estáu de drechu nesi país, “en defensa de la democracia, la paz, la soberanía y la autodeterminación de Bolivia, en base a los drechos de los pueblos ya ensin denguna inxerencia esterna”.

Los aconceyaos, qu’ocuparon la plaza del Teatru Campuamor con asturines y whipalas, desixeron el respetu a los drechos humanos en Bolivia y alertaron de la violencia desatao contra la población civil, especialmente la indíxena, los miembros d’organizaciones sociales, periodistes y representantes del gobiernu d’Evo Morales, los sos familiares, dirixentes y militantes del MAS, pente otros.

Nes sos pallabres de sofitu reconocieron el valor del pueblu bolivianu, que cada díe se manifiesta en la Paz coles sos banderes whipalas  y cada nueche cellebra xixilies de protesta “Una decisión inquebrantable: activaron la memoria histórica, aimara, antigua, y la reciente, del llevantamientu del 2003 onde fueron asesinaes sesenta y cinco persones”. Agora son 24 los muertos reconocios y la llicencia pa matar ta na cai, aceutada esplicitamente polos golpistes.

Tamién remembraron que’l de Bolivia nun ye l’únicu conflictu activu en Sudamérica, mencionando a Chile, Colombia, Ecuador, Perú, Brasil y Haiti, onde’l númberu d’asesinaos nos tres caberos meses supera la cuarentena, ante’l silenciu mediáticu.

Nuria Prendes

This work is licensed under a Creative Commons Attribution 4.0 International License.