Asociaciones de pescaores lleven años protagonizando una campaña a favor del desaniciu del cormorán grande, especie autóctona de los ríos asturianos, asina comu de la llóndriga, la garza y l’andarríos
Nos prósimos meses polo menos 240 cormoranes (Phalacrocorax carbo) sedrán eliminaos de les cuenques asturianes, 90 na del Nalón, 40 na cuenca Caudal-Ayer, 50 na del Narcea, 30 na del Sella, 20 na cuenca del Deva/Cares y la del Bedón, 5 na del Esva y 5 na del Navia. Diez asociaciones ecoloxistes, ornitolóxiques y vecinales consideren esta actuación desproporcionada y creen que podría vulnerar la llexisllación vixente.
El cormorán grande ye una especie migratoria, non alóctona, ivernante nos ríos y costes asturianes, que tienen la función de caltener l’equilibriu del ecosistema. Dellos trabayos científicos amuesen que, comu pasó n’Asturies, los controles lletales nun algamen l’oxetivu de reducir la so población nin d’aparar la desapaición de les especies piscícoles.
Nos 13 años que l’alministración del “Principado” lleva realizando controles poblacionales de cormoranes grandes van eliminándose oficialmente más de 3.000 individuos d’esta especie, amás de los ferios y los non contabilizaos, ensin qu’ello repercuta na meyora de les poblaciones de salmones y truches que continuen amenorgando.
Pa los grupos que denuncien esto, los vraeros problemes de los pexes son la contaminación, el furtivismu, canalización de calces y dragaos de ríos, desaniciu de la viesca de vega y de los frezaeros, presencia de banzaos ya otres torgues al llibre movimientu de pexes nos ríos, introdución d’especies alóctones y sobrepesca.
Poro, soliciten a l’alministración asturiana el cese de les práutiques de descaste de cormoranes grandes y qu’esclarie la so posición en contra’l control d’otres especies protexíes pola llexisllación actual, comu llóndrigues, garces y andarríos, acometiendo les actuaciones precises p’afitar la conservación de les especies autóctones de salmónidos, recuperando calces fluviales, persiguiendo’l furtivismu y aparando la contaminación, pente otres midíes.
Redaición InfoAsturies
This work is licensed under a Creative Commons Attribution 4.0 International License.
