El recién incrementáu salariu del presidente del “Principado”, Adrián Barbón multiplica por 21 los ingresos de los 48.973 asturianos, más de la metá d’ellos trabayando, que cobraron l’añu pasáu una media de menos de 250 € al mes

Trabayar ya nun garantiza un nivel de vida dignu. Más de 25.000 trabayadores asturianos declararon a l’Axencia Tributario menos de 3.000 euros, sumando tolos ingresos del añu pasáu -salarios, pensiones, prestaciones y aides- ello ye, que tuvieron pa vivir menos de 250 euros al mes. Cuasi otros tantos viven na mesma situación siendo paraos -alrodiu de 13.000- o pensionistes -11.700-.Un total de cerca de 50.000 asturianos que tienen que cubrir toles sos necesidaes -ya en munchos casos les de les sos families- con menos de lo que cuesta l’alquiler más baratu.

En total, son 246372 los asturianos y asturianes que nun lleguen a mileuristes. Son asalariaos, pensionistes, desemplegaos o pasen a lo llargo l’añu por más de una de estes categoríes.

Amás, el 56 % de la población asturiana depende, en mayor o menor midía, d’aides públiques pa subsistir, incluyendo pensiones, subsidiu por desemplegu o salariu social, siendo Asturies, depués d’Estremadura, la parte del estáu con menor porcentaxe d’asalariaos, namás el 44’07%.