El Conseyu Regulador de la IGP Xata Asturiana llama al consumu de xata’l país pa frenar la despoblación rural
Nos 17 años d’hestoria d’esta IGP, el valor comercial de la Xata Asturiana pasó de los dos millones d’euros a los 32,6 millones que se facturaron nel 2018. Ello pesi a la crísis, a la despoblación, a la baxada del preciu de venta y l’espoxigue de los costes de produción y de les desixencies llegales, ensin escaecer l’espardimientu de formes de consumu qu’escluyen la carne.
Respeutu a estes caberes, los ganaderos llamenten qu’aquellos que lluchen pol respetu animal traten por igual la ganadería asturiana y los sistemes de produción masivo, nos que los estándares de calidá, caltenibilidá respetu y curiau del animal disten muncho de los de les más de 6.000 esplotaciones ganaderes n’activu n’Asturies.
Los responsables de la IGP Xata Asturiana caltienen el so optimismu, sofitaos nos datos qu’amuesen el xorrecimientu y consolidación de la marca. El caberu añu la incorporación de mocedá, especialmente de muyeres xóvenes, a l’actividá ganadera averóse a les 300 persones, una cifra perbona y esceicional na cabera década. Dende la IGP esperen qu’esto marque l’aniciu d’una recuperación del númberu de ganaderos y, por ende, de la población rural. Poro, nun duden etiquetar col hastag #HaiFuturu nes sos espublizaciones.
Vitor Corte
This work is licensed under a Creative Commons Attribution 4.0 International License.
