El nuesu estatutu d’autonomía nun reconoz Asturies como nación hestórica y la nuesa llingua nun ye oficial pero vienen de gastar 60.000 euros nuna banderona d’España. Si te indigna pon la asturina nel to perfil de facebook o instagram

La refuga xenerada pola descomanada banderona del Reinu d’España que se llantará nos prósimos díis na Plaza la Escandalera, n’Uviéu, ta teniendo importante sonadía nes redes -tanto facebook comu instagram ya twitter- onde les protestes de la ciudadanía escontra esta imposición españolista ya esti gastu improcedente son continues.

Dientro d’estes amueses, destaca la campaña “una asturina nel to perfil” que contrapón una lluvia d’asturines nes redes sociales a la menacia colonialista megalómana en forma de trapu xigante col que los señores Canteli (PP) y Cuesta (Ciudadanos) faen por vindicar la españolidá d’Asturies.

Si daquien quier xunise a esta iniciativa a mou de protesta pola banderona d’España n’Uviéu puede poner la bandera d’Asturies como marcu nel so perfil. Pa ello hai que pinchar na camarina de semeyes qu’apaez nel mesmu y picar llueu en “añadir marcu”, escribiendo nel guetaor (llupa) la pallabra asturina, Asturies o fondo asturina, escoyendo esi marcu.

En pallabres del aniciador d’esta campaña, Mario Arbesú, “Asturies seguirá siendo Asturies con o sin banderona d’España, lo único qué les asturianes y asturianos dispondrenos de 60.000 euros menos pa sanidá, educación, servicios sociales, protección del patrimoniu o normalización llingüstica, sentirémonos un poco más humillaos y un poco menos identificaos con España pero pa eso nun facía falta tanta tela Señor Canteli incluso con un poco menos tamién valía”.

This work is licensed under a Creative Commons Attribution 4.0 International License.