Una espublización de facebook pidi a les muyeres que la llean que comenten con un puntu si carecieron dalguna triba de maltratu, acosu o abusu pol fechu muyeres. En menos de 24 hores retrucaron -afirmativamente- más de trece mil muyeres

El post, de la páxina de “Sexprésate”, especifica una riestra d’acosos más o menos avezaos que van dende’l ñalgazu y l’esibicionismu a l’agresión física, pasando poles menacies, el control o l’abusu de poder, pero nun pide que s’especifique que tipu de maltratu se carez o careció, daqué que facilita que les muyeres reconozcan los fechos ensin comprometese cuntando detalles concretos.

La intención d’esta espublización ye tantu visibilizar la estensión d’esti problema comu facer ver a los homes qu’estos nun son fechos aisllaos, sinon que ye daqué qu’algama o algamó en dalgún momentu a la mayoría de les muyeres que conocen. Una de les cuestiones más esmoleceores ye la edá: n’Asturies la edá a la que les neñes entamen a carecer acosu na cai son los 12 años.

“Amiga,

Pon un puntu nesta espublización si dalguna vegada un home t’acosó na cai, xiblóte, chuleote, llanzóte un besu o un ñalgazu, fizo por enfilate/drogate, si dalguna vegada te siguieron, masturbáronse frente a ti, ficieron por abusar de ti, tocáronse pegaos a ti, acosáronte por internet, mandáronte desnuos que nun pidiste, dixéronte que te van violar, matar, secuestrar, si dalguna vegada un home t’insultó, masuñó, agredió física y sesualmente, si dalguna pareya te prohibió daqué, te separtó de la to familia o de los tos collacios, fizo por controlate, amenorgate, discriminate, si dalguna vegada un home utilizó’l so poder (físicu, económicu, académicu, istitucional, llaboral…) p’aprofitase de ti. 

Naide sabrá cuál de toes eses coses te pasó, pero ye pa visibilizar que SÍ mos pasa, y que tolos homes conocen a una muyer que vivió la violencia machista.”

La rempuesta foi masivo, na primer hora pasó de los 500 puntos y en namás un díe algamáronse los 14.000 reconocimientos na espublización, aproximadamente diez por menutu. A ellos habría que sumar los puntos retrucaos nes 2. 400 espublizaciones que compartieron el testu nesi primer díe y que recibieron la rempuesta na páxina d’otros usuarios/es.

This work is licensed under a Creative Commons Attribution 4.0 International License.