El que trabaya arguyosu failo a cara descubierto y a la lluz del díe. Si, amás, lo que se fae ye pol bien común o comu poco, prestoso pa la población, ye avezao que los políticos aprofiten la ocasión pa la semeya, la fanfarria y l’aplausu públicu. Namás el lladruepu, el que tien daqué qu’ocultar o s’avergoña de lo que fae anda a escondidielles, lloñe de cámares y espeutadores
Llucía F. Marqués
Asina se punxo la banderona d’Uviéu, 54 metros cuadraos de vergoña escolingaos por operarios de madrugada, pa que los madrugaores toparen ya el fechu consumáu al riscar. Una bandera monárquica de proporciones megalómanes na más emblemática plaza d’Uviéu, puntu cientral de tantos alcuentros y revindicaciones, alzada a escondidielles, con nocturnidá y alevosía, ensin semeya oficial, ensin actu nin proclama. Porque saben lo que tan faciendo, saben que ponen el trapu a la contra de les voluntaes del pueblu. De magar agora, cámares y xixilancia continua garantizarán que naide atente escontra la preba irrefutable del poderíu patriarcal español: ellos tiénenla más grande.
Quiciás el meyor puntu de vista pa ver la cuestión seya’l propuestu por dalgún avispáu nes redes: dende’l Culis Monumentálibus de la Cai Pelayo. Les utilidaes de la bandera, dende esta perspeutiva, déxoles a la imaxinación del llector.
This work is licensed under a Creative Commons Attribution 4.0 International License.
