Los intentos de la monarquía española de remanar la hestoria d’Asturies ya’l país mesmu al so favor son continuos. Nesti casu, feliciten les fiestes navidiegues con una semeya de so n’Asiegu

La continua utilización de símbolos y llugares asturianos de la que faen gala dende’l reinu d’Asturies tien un episodiu más, por segundu añu consegutivu, nes navidaes. Tres de la visita a Cuadonga’l mesmísimu ocho Setiembre del 2018, los Premios nel Campuamor, los “miradores” monárquicos de Picos, agora traten d’averase al Pueblu Asturianu, reconocíu comu un de los más republicanos del estáu, al traviés d’una semeya familiar en correor.

“Asturias es mi casa” declara la futurible reina d’España, y esa ye la so intención: okupar Asturies y convertila nel so cortixu particular. Pa ellos Asturies ye un decoráu perfechu nel que sobramos namás los asturianos y la nuesa identidá, una semeya vacía (meyor dicho, vaciada) na que figurar y unos raigaños hestóricos nos qu’afitar con falacies la so monarquía.

La trampa ye un camín de día y revolvía, non solo faen por normalizar la so presencia impuesta n’Asturies, sinon que cara al restu de territorios dase una imaxen alterada de los asturianos, na que paez que los monarques gocien d’apreciu y reconocimientu equi. La realidá ye bien otra: Asturies acueye va cerca de dos décades al menos cuatro actos añales nos que se reclama la República Asturiana (25 Mayu, 8 Setiembre, 12 ochobre y 6 d’Avientu), llevando dos años en marcha les campañes #RepúblicaAsturiana y #Asturiesnuntienrei, amás del ya tradicional y multitudinariu actu de refuga a la monarquía española qu’acompanga añalmente la entrega de los Premios Principiegos, actos toos que carecen un ferreu silenciamientu mediáticu que contrasta xabazmente cola descomanada cobertura fecha al más mínimu xeitu de les sos maxestaes.

Llucía F. Marqués

This work is licensed under a Creative Commons Attribution 4.0 International License.