El repartu de posibilidaes pesqueres recien aprebáu pol Conseyu de Ministros de Pesca de la Xunión Europea recorta en fasta un 40’7% los cupos de cuasi toles especies
Cuando el seutor entá nun se recuperó del guelpe que representó l’amenorgamientu nun 75% de la cuota de xarda l’añu pasáu, que punxo en pelligru la continuidá de la actividá de dellos pesqueros, llega agora l’hachazu col que los ministros europeos recorten les cotes de cuasi tolos cupos de captura.
La peor parte llévenla los pescaores de chicharru, con un 40’7 % menos de permisu de pesca, pero nun son los únicos. Podrá pescase un 20% menos de llinguáu y merluza d’agues comunitaries, el 10% menos d’abadexu, el 5’5% menos de merluza costiega ya’l 3’4% menos de bocarte y pixín. L’incrementu nun 40% de la cuota de xarda nun algama pa cubrir la baxada de los años anteriores y ta pendiente de ver comu se reparte pente toles flotes del Cantábricu.
Sicasí, el director xeneral de Pesca del “Principado” declárase optimista, llegando a declarar que “Asturies puede tener un signu positivu no que cinca a capacidá de pesca en 2020” y anunciando que diba pidir ayuda a Madrid pa frenar el golpe.
El so optimismu contrasta colos datos, non solo d’estos recortes, sinon de la trayeutoria del seutor: el númberu d’embarcaciones dedicaes a la pesca n’Asturies cayó en más del 50% na cabera década, cuntando namás con 258 de les 4.861 embarcaciones que componen la flota cantabrica.
Llucía F. Marqués
This work is licensed under a Creative Commons Attribution 4.0 International License.
