Ca añu Andecha Astur aconceya nel cimenteriu de Deva pa homenaxear esa importante figura de la lliteratura asturiana cuya faceta más política aveza ser tapecida

Andecha Astur honra esti sábadu 28 d’Avientu a les 13:00, la memoria del poeta asturianu Andrés Solar (1955/1984) conocíu pol so fondu compromisu con Asturies que tan bien supo espeyar nos sos poemes. Nel actu, que tendrá llugar frente la placa colocada na so memoria a la puerte’l campusantu de Deva (Xixón) fadráse una ufrienda floral y lleeránse dalgunos de los sos poemes más representativos.

Andrés Solar foi un de los personaxes más activos y comprometios del resurdimientu asturianu, miembru fundaor del Ensame Nacionalista Astur,  partíu pol que se presentó como candidatu a la Xunta Xeneral, foi  profesor de llingua asturiana na UP de Xixón,  espublizando amás abondos articulos en prensa; ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi tesoreru de l’Asociación d’escritores Asturianos y miembru de Conceyu Bable y deXunta pola Defensa de la Llingua Asturiana, siendo en tou momentu un referente pola so implicación, capacidá de trabayu y cualidaes presonales, Andrés Solar Santurio algamó na so curtía vida merecíu reconocimientu como autor, finando traxicamente a la curtia edá de 29 años, dexando incompleta la so obra pero regalándomos anantes los sos perguapos versos:

Vamos dexar de vivir

de gaita sidra y tambor,

de la Santina na cueva

y de castros baxo’l sol.

————————

Óyense voces falando

de pueblos y llibertá,

de roses llorando espines,

de palombes y un riscar.

———————–

Xunto la fábrica encesa,

la mina prieta, la mar

y la secha ensin llabrar:

asperámoste pruyendo

por vivir pallabres vieyes

comu pueblu, home y llar.

————————-

Prúyemos un pueblu llibre:

que ñome cola xo voz

los sos collacios y el pan.

Prúyemos un pueblu llibre

y una Asturies dixebrá.

This work is licensed under a Creative Commons Attribution 4.0 International License.