A cuatro díes de sentase na mesa de negociaciones la patronal de los supermercaos asturianos entamen les represalies sobre les emplegaes revindicatives
Avérase’l 13 Xineru, fecha alcordada polos sindicatos pa sentase a axustar el conveniu cola patronal, un conceyu pal que foi necesario la mediación del gobiernu del “Principado” y la paralización de la esitosa fuelga que taben desendolcando les trabayaores del seutor.
De magar la desconvocatoria de fuelga, el pasáu 27 d’Avientu les y los trabayadores que lu secundaron tuvieron de soportar presiones coles que se yos intenta disuadir d’entamar de nueu les movilizaciones, casu de nun algamar un alcuerdu. Viendo qu’estes presiones nun amenorgaben l’ánimu de llucha de dalgunes trabayaores, el martes una de les empreses afeutaes, supermercaos Más y Más, decidió despidir a la so panaera, alegando “comentarios claramente ofensivos a la empresa, veceros y terceros” por colgar en Facebook post comu “Esa pana como mola, merezse una olaaa!!!. Güei coméis pan Bimbo”. Sigún relató l’afeutada, la mesma directora de recursos humanos de la empresa, Carmen Tuñón Lucas, foi quien-y apurrió en man la carta de despidu, desplazándose pa ello al cientru de trabayu y aprofitando pa solta-y que “Yá somos mayores d’edá y tienes dos fíos”
La trabayadora nun tien sanciones nin amonestaciones previes, pero pa Más y Más, los sos comentarios “estropien la imaxe de la empresa”. El despidu ye vistu polos sos compañeros como “Una vendetta en toa riegla, un escarmientu con un únicu oxetivu: amedranar a les y los rabeliscos”; pa ellos, la collaboración de los esquiroles señalando a los cabezaleros na fuelga ye imprescincible pa que se lleven a cabu esta triba de represalia cola que la patronal fae por dinamitar anantes d’entamar una negociación que nunca quixeron “Los esquiroles son los aguarones del patrón y fáen-y el trabayu más puercu, que nun se nos escaeza”.
La trabayaora recurrirá el despidu por dir contra’l drechu a la llibertá d’espresión y a la fuelga.
Pablo Álvarez Fernández
This work is licensed under a Creative Commons Attribution 4.0 International License.
