Ayeri yera la fecha fixada pal desagospiu del Palaciu de Bernaldo Quirós de Ronzón, en L.lena, ocupáu comu cientru social dende’l pasáu mes d’abril, pero la presión vecinal consiguió aparar el mesmu
La mansión qu’acueye’l Cientru social el Palaciu ye propiedá de la Fundación Ronzón, propietarios tamién de grandes estensiones de tarrén na fastera, heriederos de tiempos feudales. La Fundación anició un procesu civil al pocu de producise la okupación, que tuvo comu consecuencia el primer intentu de desagospiu del Palaciu, desoyendo el poder xudicial los argumentos d’abandonu previu y utilidá social y los intentos d’aportar a un alcuerdu por parte de los integrantes del cientru social.
L’Asociación Social Escanda, protagonistes de la okupación, defenden la utilización d’El Ronzón non solo pa day utilidá social, sinon pa lluchar contra l’acumulación de propiedaes vacies nun país con más de 700 pueblos abandonaos “porque creemos na okupación como un recursu pa la comunidá”.
L’apoyu de la población, que cortó la carretera d’acesu al cientru, consiguió paralizar ayeri la desokupación del Palaciu, pero nun ye definitivo. La viviente cita ye pal tres de febreru, cuando tornarán a intentar desanicialu “si ye necesario, con intervención de les fuercies de seguridá”, polo que piden a los asturianos qu’acudan a echar un gabitu y tornar a torgar el desagospiu.
Nuria Prendes
This work is licensed under a Creative Commons Attribution 4.0 International License.
