Organizaciones sociales, polítiques, culturales, sindiclaes, vecinales o de cualisquier otra triba tan convidaes por Andecha Astur a dar una rempuesta xunitaria contra la planificación llexislativa del “Principado”

El proyeutu llexisllativu presentáu por Barbón ya’l so gobiernu ye continuista cola llinia de los anteriores gobiernos, que llevo a Asturies a la actual situación de cris económica y sociollaboral perafitándose na corrución istitucionalizá que denunció’l propiu Tribunal Supremu, y ñegando la identidá hestórica, cultural ya idiomática d’Asturies.

En concreto, esti proyeutu pa los vinientes cuatru años de xestión político nun toca cuatro temes fundamentales que precisen d’una intervención darréu p’asegurar el futuru d’Asturies, polo que la formación nacionaliega ta entamando una ronda de contautos con organizaciones asturianes d’estremáu calter coles que cuenta xenerar un frente común que permita dar rempuesta a esta xestión, plantegando una nuea dinámica de defensa d’Asturies.

Andecha Astur echa en falta nes lleis proyeutaes la llucha contra la corrución ya’l control de la xestión público prometios y considera una tomadura de pelu que la oficialidá y les polítiques d’escolarización y normalización social de la llingua nun apaezan siquiera mencionaes. Más urxente si cabe ye la llexisllación en materia de seutores productivos, emplegu, redistribución de la riqueza y recuperación demográfico, cuestiones nes qu’Asturies pierde puestos con velocidá y de les que depende la calidá de vida de les y los asturianos. Finalmente,  y como mediu pa enfrentar tolo anterior, Andecha Astur ve tamién necesario superar el marcu políticu qu’Asturies carez anguañu “una institución, el “Principado”, y un Estatutu d’Autonomía impuestu, ensin dengún poder políticu, mediu baleru de competencies, con competencies concedíes y ensin asumir, y ensin incluyir denguna nuea dende 2006”.

Eses son les cuatro exes nes que cientra la so ufierta de collaboración y nesi sen ta aniciando los contautos con otres organizaciones, coles qu’apautará los prósimos pasos a dar, convidando a cualisquier otra que quiera participar d’esti movimientu a ponese’n contautu con Andecha Astur a traviés de la so páxina web o redes sociales.

Nuria Prendes

This work is licensed under a Creative Commons Attribution 4.0 International License.