Los datos relativos a la variación vexetativa de la población -ello ye, a la diferencia pente nacimientos y muertes nun añu- recuéyense n’Asturies de magar l’añu 1.966. Nesa fecha el saldu yera nidiamente positivu y asina siguió siéndolo durante 16 años, seique con grandes desemeyances, pasando d’un saldu positivu de +7.10 por mil dica’l + 0’4 nel 1.984, algamando datos negativos por primer vegá colos -0’27 del añu 1.985. De magar entós, nin un solu añu en positivu, fasta aportar a la cifra del 2.019, la pior dende que se rexistren datos.

Asturies lleva cerca d’una década cola tasa de mortalidá más alta del estáu, con 12’92 fallecimientos por cada mil moraores el caberu añu, y la tasa de nacencia más baxa, de namás 5’3, ello ye, con un saldu de -7’62 por mil, cifra que cuadra perfechamente cola perda de 7.742  asturianos. Son datos de la Sociedá Asturiana d’Estudios Económicos e Industriales (Sadei) onde se recueye que’n 2019 contabilizáronse nel país 5.264 nacimientos y 13.006 defunciones.

A esta cayía hai que sumar un saldu migratoriu tamién negativu del 5’2 que se torna en más de 5.300 persones menos viviendo n’Asturies por esta razón. Un total d’alrodiu de 13.000 menos, que nos averen pali que pali a baxar del millón y qu’evidencien la progresiva desapaición del nuesu pueblu, xustificando les voces que falen del Xenocidiu Asturianu.

Nuria Prendes